٥ـەم ئاڵوگۆڕی ئەسیر لە غەززە لە نێوان حەماس و رژێمی داگیرکەری سەهیۆنی ئەمڕۆ بەڕێوە دەچێت و حەماس ٣ کەسی ئازاد دەکات و لە بەرامبەردا رژێمی داگیرکەر ١٨٣ کەسی ئازاد دەکات.

پێنجەم ئاڵوگۆڕی ئەسیر لە نێوان حەماس و رژێمی داگیرکەری سەهیۆنی ئەمڕۆ بەڕێوە دەچێت.

حەماس ٣ ئەسیری داگیرکەری پیاو بە ناوەکانی ئێلی شارابی، ئۆر لێڤی و ئۆهاد بن ئامی ئازاد دەکات. یەکێک لە ئەسیرەکان بە ناوی ئۆهاد بن ئامی هاوڵاتی رژێمی داگیرکەر و ئەلمانیایە.

لە بەرامبەردا رژێمی داگیرکەری سەهیۆنی ١٨٣ فەلەستینی ئازاد دەکات کە ١٨یان سزای زیندانیبوونی هەتا هەتای، ٥٤یان سزای قورسیان بە سەر سەپێندراوە و ١١١یان دوای ٧ی ئۆکتۆبەری ٢٠٢٣ لە لایەن رژێمی داگیرکەر لە کەرتی غەززە دەستبەسەر کراون.

تاوەکو ئێستا حەماس ١٣ ئەسیری داگیرکەر و ٥ ئەسیری تایلەندی ئازاد کردووە و لە بەرامبەردا رژێمی داگیرکەر ٥٨٣ فەلەستینی ئازاد کردووە.

قۆناغی یەکەمی رێککەوتنی ئاگربەست ٤٢ ڕۆژ دەخایەنێت و لەو قۆناغەدا ٣٣ ئەسیری داگیرکەر ئازاد دەکرێن. لە بەرامبەر هەر مەدەنیێک ٣٠ فەلەستینی و لە بەرامبەر هەر ئەسیری سەربازی ئافرەت ٥٠ فەلەستینی ئازاد دەکرێن.(İLKHA)